Основачот на сајтот Викиликс и истоимената партија во Австралија, Џулијан Асанж презеде денеска одговорност за кризата што почна поради оставки на водечки кандидати на партијата за изборите за Сенат.
Тој призна дека своето внимание премногу го фокусирал на Едвард Сноуден и Бредли Манинг.
Неодамна основаната партија влезе во криза откако водечкиот кандидат Лесли Канолд поднесе оставка заради како што објасни таа, недостиг од одговорност, демократичност и транспарентност во партијата.
Таа беше втор по ред кандидат на Викиликс за Сенатот по Асанж. Доколку таа партија освои место во парламентот на изборите на 7 септември, Канолд веројатно би го зазела местото на Асанж во Сенатот доколку тој не би можел да се врати во Австралија. По оставката на Канолд истото го направи и Даниел Метјуз еден од 11 членови на националниот совет на партијата Викиликс.