Речиси 90 отсто од Јапонците поддржуваат измени во законот, со кои ќе му се дозволи на царот Акихито да абдицира, што не е можно според сегашниот закон, покажува истражувањето на весникот „Никеј“ и телевизијата „Токио“.
Анкетата, која е спроведена меѓу 9 и 11 август со учество на илјада лица, покажува дека 89 проценти од испитаниците сметаат дека треба да му се дозволи на царот да абдицира, а четири отсто се изјасниле против.
Дебатата започна откако во понеделникот 82-годишниот император Акихито во своето обраќање истакна дека би сакал да се повлече од престолот, додека е се уште жив, бидејќи стравува оти не може да ги извршува целосно должностите како „симбол на народот и на единството на нацијата“ поради неговата возраст и здравствена состојба.
Јапонската Влада и Парламентот треба да покренат иницијатива за измена на сегашниот закон, кој не предвидува можност за абдикација. Царот Акихито го наследи својот татко Хирохито во 1989 година.