Делегација од американски парламентарци се сретна вчера во Хавана со кубански дисиденти.
– Парламентарците сакаа да го слушнат нашето мислење, и го изразија своето, изјави Елисардо Санчез, претседател на Кубанската комисија за човекови права – забранета организација но толерирана од властите.
Според Санчез, 15 дисиденти учествувале на средбата, која траела два часа во резиденцијата на шефот на Одделението за американски интереси во Хавана.
Тој појасни дека средбата ги покажала разликите меѓу дисидентите во однос на промената на политиката на САД кон островот, објавена на 17 декември.
– Меѓу нас има две мислења – едни гледаат со добро око на обновата на дипломатските односи, а други не ги гледаат нештата на тој начин, рече Санчез.