Министерот за надворешни работи на Малта, Кармело Абела изјави дека Европска Унија ја разгледува можноста за воведување на нови санкции кон Владата на претседателот на Венецуела, Николас Мадуро, но оти се уште не разговарале за ембарго на нафтата.
„Бараме можност за воведување на понатамошни санкции, нашата намера е да се санкционираат одредени поединци пред секторите кои би можеле да влијаат врз населението“, посочи Абела по средбата на министрите за надворешни работи на земјите членки на Унијата.
Тој додаде дека не се исклучени и санкции кон одредени сектори во Венецуела.
Претходно, Владата на Венецуела најави дека ќе ги преиспита билатералните односи со земјите членки на Европска Унија, кои го признаа опозицискиот лидер Хуан Гуаидо за привремен претседател на земјата.
„Најсилно се отфрлаат одлуките на некои европски влади, кои официјално се покорија на стратегијата на администрацијата на САД да го соборат од власт легитимниот претседател Николас Мадуро“, се наведува во соопштението на венецуелската Влада.
Досега 11 земји членки на ЕУ го признаа Гуаидо за привремен претседател на Венецуела. Претходно, Италија го блокираше нацрт соопштението на ЕУ во кое се наведува дека сите земји членки на Унијата ќе го признаат Гуаидо за привремен претседател на Венецуела. Спротиставувањето на Италија спречи да се донесе единствен став на ЕУ за Венецуела.
ЕУ му дадоа рок, што истече на полноќ, на Мадуро да распише нови претседателски избори, во спротивно ќе го признаат опозиционерот Хуан Гуаидо како легитимен привремен претседател додека тој не организира нови избори.
Мадуро вчера го одби ултиматумот на ЕУ.