„Очигледно министерот Панче Тошковски оди по стапките на својот идол – Никола Груевски и делува како негов партиски клон. Со предлог законските измени кои Тошковски ги предлага во Законот за полиција, тој готви партиска милиција на ВМРО-ДПМНЕ под негова контрола. Наместо модерна, професионална, европска полиција – Тошковски го претвора Министерството за внатрешни работи во пара-полициски апарат на ВМРО-ДПМНЕ. Ова не е реформа, ова е отворање на вратите за криминалци, послушници и партиски војници. Ова е рецепт за полициска држава!“ рече денеска на прес-конференција портпаролката на СДСМ – Богданка Кузеска.
Според неа, „Законот за измени на Законот за полиција што го предлага Тошковски е опасен за целиот безбедносен систем, антиевропски и длабоко корумпиран обид за партизација на полицијата, елиминација на кариерниот систем и уривање на безбедносниот поредок“.
Шест клучни точки во предлогот на Тошковски кои се скандалозни:
1.Се симнуваат критериумите за образование и искуство за највисоките оперативни позиции во МВР.
Тошковски отвора простор партиските послушници без ден искуство да командуваат со полициски сили. Без стручност, без кредибилитет – само со партиска книшка.
За директор на полиција се намалуваат критериумите толку многу, со тоа што може да биде и од редовите на советодавни позиции. Во суштина лице кое било само советник и никогаш не раководело ниту со 5 луѓе по логиката на Тошковски треба да раководи полиција и да се грижи за безбедноста на државата?
2.Се бришат условите за минимум 6 години искуство и 4 години на раководни позиции. Дури и шеф на СВР ќе може да биде било кој по избор само на Тошковски. Луѓе со децениска кариера ќе бидат понижени од политички вработени без знаење и без искуство.
3.Се укинуваат регионалните центри за гранична контрола. Во време на геополитички ризици, Тошковски удира по границите. Дали ова е подготовка за нелегални шеми со мигранти во нашата земја?
4.Се овозможува бришење на полициски податоци. Нема траги, нема евиденција, нема докази – само заштита на криминалот под капа на ВМРО-ДПМНЕ и Панче Тошковски.
5.Се подига старосната граница на 30 години со што Тошковски ги елиминира младите, образовани луѓе само за да вработуваат партиски луѓе.
6.Најскаданлозно е бришењето на член 19 од Законот. Тошковски си дава овластување да држи во полиција осудени лица и прекриштели на внатрешни процедури и правила. Ова е одредба за организиран криминал во униформа!“ велат од СДСМ.
Кузеска смета дека „Панче Тошковски сака моќ, а не ред. Сака контрола, а не владеење на законот. Наместо полиција што штити граѓани, Тошковски прави партиска милиција што штити криминалци. Мијалков и Груевски беа мали деца за овие намери на Тошковски“.