На спортскиот аеродром кај мало Коњари, Прилеп денеска и утре се одржува Светски куп во воздухопловно моделарство.
– Се одржуваат два македонски натпревари од Светскиот куп: „Прилеп Куп – Трофеј на Прилеп“ и „Македонија Куп“. Ќе учествуваат 118 натпреварувачи во пет категории за јуниори и сениори од 15 држави. Ова досега е најголем и по бројност и по квалитетот на учесниците, изјави Здравко Тодороски од македонската федерација на воздухопловно моделарство.
Во Прилеп учествуваат светски и европски шампиони и најдобрите од светскиот куп.
– Прилеп по 14. пат е организатор на овие натпревари. Учествуваат светски и европски шампиони и најдобрите од светскиот куп. Се одржуваат натпреварите во воздухопловно моделарство во категоријата слободни летачки модели, која е најтешка и најзастапена во натпреварите во Светскиот куп. По сите анализи во натпреварите од светскиот куп македонските натпревари се едни од ретките каде има толкава бројност, присуство од повеќе држави, и пред се толку висок квалитет на учесниците, вели Тодороски.
Според градоначалникот на Прилеп, Марјан Ристески локалната самоуправа го поддржува секогаш светскиот куп.
Учесниците задоволни од почетокот на дводневните натпревари.
– Среќен сум што по повеќе години дојдов пак во Македонија. Овде неколку години се одржуваат натпрееварите од Светскиот куп зашто локацијата е одлична, вели Дамир Косовиќ од Хрватска.
Натпреварите се одржуваат до вечерните часови и продолжуваат утре.
Составен дел на овие натпревари е и Европскиот „Еурочеленџ“ Куп натпревар за сениори и јуниори во воздухопловно моделарство за едрилици со помала носечка површина.
Вкупно 15 учесници ќе се борат за медалите на прилепските куп натпревари, а воедно ќе се обидат да обезбедат бодови за генералниот пласман во Евро Купот.