Во Прилеп од денеска до недела се одржува Камп за млади шахисти од градот домаќин, Скопје, Неготино и Охрид кои се најдобри во своите категории во земјава.
Според шаховскиот велемајстор Трајко Недев, во кампот во хотелот „Сонце“ во Прилеп се најдобрите млади надежи на Македонија.
– Целта е да се поттикне иницијатива, шахот да заживее и да добие поголема поддршка, изјави Недев, шаховски велемајстор од Неготино.
Велемајсторот, државен репрезентативец Звонко Станојоски е тренер на младите шахисти. Очекува дека нивното учество во кампот ќе гарантира успеси на македонската репрезентација во шах.
Кампот го отвори градоначалникот Илија Јованоски нагласувајќи дека Македонија има млади надежни шахисти за големи натпреварувања.
– На организаторите и присутните им посакувам успешно да го завршат овој камп. На младите следбеници на оваа древна игра им посакувам да земат подобра позиција на европското и светското првенство во шах, што ќе се оддржат во наредниот периодГорди сме што има од кого да научат. Тука се велемајсторите кои ги подготвуваат за наредниот период, изјави Јованоски.
Младите шахисти со импресии зборуваат за натпреварот.
– Долго време учествувам на државните првенства и на други турнири низ Македонија и други држави. Интересно е бидејќи има многу различни варијанти, можности за играње, како и возбудливи моменти, вели Матеј Ѕвездакоски од Прилеп.
– Јас сум првак на Македонија до 14 години. Шахот ми е интересна игра, има многу варијанти и можности за играње, вели Христијан Цакончев од шаховскиот клуб „Алкалоид Скопје“.
Овој камп е еден од трите планирани во државава. Првиот е организиран во Неготино, а сега во Прилеп.
Според најавите на организаторите, првите десетина учесници – државни прваци во своите категории, ќе учествуваат во сите натпреварувачки кампови.