Во организација на Агенцијата за млади и спорт, Сојузот на спортските федерации и Општина Охрид, во спортската сала на ОУ „ Григор Прличев“ денеска беше промовиран проектот „ Спортот и семејните вредности“.
По Скопје, Прилеп, Штип, Василево, Кочани, Кратово и Македонски Брод и Берово Охрид е општината во која помина Караванот на АМС и Сојузот на спортски федерации на Македонија за промоција на проектот.
Основната намена на проектот е да се промовира спортот преку семејните вредности и да се стимулираат граѓаните преку спортот и спортските активности, да се дружат повеќе меѓусебно и да се зајакнат врските во семејството.
Во спортската сала во Охрид дечињата заедно со нивните родители беа дел од најмасовно организирани другаруваа и се натпреваруваа во штафета со топка,подавање под нозе и со глава, фудбал и ракомет, штафетно пресоблекување дрес и шутирање топка на мали голови.
Настанот го отвори претседателот на Сојуз на спортски федерации Наташа Илиевска Јордановска која изрази задоволство од масовноста и од подготвеноста на посетителите да спортуваат и низ заедничка дружба да ги промовираат спортските принципи.
– Веруваме дека со реализацијата на овој проект ќе ја постигнеме целта, а истовремено младите луѓе ќе ги стимулираме да се занимаваат со спорт и спортски активности. Денеска нема да има победници и победени, денес ќе победи дружбата, изрази Илиевска.
Тони Симоновски како претставник на локалната самоуправа од Охрид беше задоволен од одѕивот на деца и родители на овој промотивен настан.
-Преку овој проект, почнува процес кој ќе помогне за подигнување на јавната свест за значењето на спортот и рекреацијата, како здрави животни навики и стил на живеење, рече Симоновски.
Повеќе од 140 деца по завршувањето на настанот добија подароци топки, стегачи и др.спортски реквизити.