Витиња (26), португалскиот играч од средниот ред и ѕвезда на ПСЖ, стави крај на неколкумесечните шпекулации за неговата иднина и евентуален трансфер во Реал Мадрид.
Во интервју за француските медиуми, тој јасно изјави дека нема намера да го напушти Париз, со што ги разочара раководството и навивачите на мадридскиот клуб, кои го гледаа како идеален наследник на Лука Модриќ.
Кога беше директно прашан за трансферот во Реал Мадрид, за кој се пишуваше со месеци во шпанските и француските медиуми, Витиња беше недвосмислен.
– Би било глупаво да си заминам. Не мислам дека е најдобро за мене. Се чувствувам многу добро тука во ПСЖ – изјави тој за Канал 11, а неговите зборови брзо ги пренесоа сите релевантни европски медиуми.
Португалецот ја нагласи својата лојалност кон клубот со кој има договор до 30 јуни 2029 година.
– Чувствувам дека луѓето ме ценат и дека заслужувам таа наклонетост. Обожавам да бидам тука, а истото го сака и моето семејство. Имаме фантастичен тим и неверојатен тренер – додаде тој.
Витиња се смета за моторот на средниот ред на ПСЖ, а во Шпанија долго време се шпекулира дека тој е играчот што недостасува во новиот проект на Реал Мадрид – вистинскиот наследник на Лука Модриќ и Тони Крос, кој би ја презел палката.
Според шпанската „Марка“, неговата цена на лето би била околу 90 милиони евра, но се чини дека ништо нема да произлезе од тој трансфер.
Освен во Реал, 26-годишниот играч од средниот ред решително ја отфрли можноста да оди во Саудиска Арабија, без оглед на финансиската понуда.
– Да не бидеме наивни. Повеќе сум посветен на стабилна кариера. Веќе заработувам многу добро тука во Европа, во голем клуб. Дуплирањето или тројното зголемување на таа плата не би ме направило посреќен, објасни тој.