Ракометарите на Вардар ја продолжија традицијата и во четвртото меѓусебно полуфинале против Загреб во СЕХА лигата ја постигнаа четвртата победа. „Црвено-црните“ триумфираа со 36:28 и се изборија за своето петто финале во ова натпреварување на шест завршни турнири.
По 2:2 на почетокот на натпреварот „вардарци“ направија серија од 4-0 за водство од 6:2. Оваа разлика нашиот првак ја одржуваше во текот на поголемиот дел од првиот дел, а во 28.минута беше и +6 (17:11). На полувреме Вардар ја имаше највисоката предност во првиот дел од 19:12. Тимот на тренерот Раул Гонзалез одигра ефикасно во нападот со само три промашувања и исто толку технички грешки. Во првото полувреме голманите на двата тима заедно имаа вкупно три одбрани (Арпад Штербик – 1, Иван Стевановиќ -2).
Во второто полувреме во 54.минута Вардар имаше и девет голови предност по водството 32:23. Најефикасни кај Вардар беа Иван Чупиќ со 8 и Вуко Борозан со 6, додека кај Загреб Златко Хорват постигна 8 голови.
Во второто полуфинале од 20 часот играат шампионот на СЕХА лигата Веспрем и домаќинот Мешков Брест, а во недела во истиот термин се игра финалето во кое Вардар го чека победникот од второто полуфинале.