Фудбалската екипа на Средното општинско стручно училиште „Илинден“ го освои првото место на државното првенство во футсал за средношколци.
Во финалниот натпревар што се одржа во Куманово, тие ја совладаа екипата на домаќинот СОУ „Гоце Делчев“ со резултат од 2:1.
Фудбалерите на „Илинден“ за прв пат ја освоија шампионската титула на првенството на кое учествуваа шесте најдобри училишни екипи од сите средни училишта во Македонија, кои претходно обезбедија пласман на првенството како финалисти на регионите.
Учениците од Општина Илинден, како во машка, така и во женска конкуренција последните неколку години постигнуваат добри резултати во повеќе спортови, еден од нив е и успехот на Гимназијадата одржана викендот во Куманово.