Еден од најпознатите светски специјалисти – невролози, Ерих Ридерер, се сомнева дека Михаел Шумахер ќе може целосно да закрепне од несреќата која му се случи на 29 декември минатата година на скијање. Ридерер смета дека славниот возач на Ф1 доживеал трајни оштетувања и дека ќе биде голем успех ако може сам да извршува некои основни функции.
„За жал, Михаел ќе остане инвалид до крајот на животот, ќе биде зависен од други луѓе. Тој доживеал трајни оштетувања и ќе биде голем успех ако може самиот да седне без туѓа помош во следните три месеци или да управува со електрична количка во следните шест“, рекол лекарот.
Сепак, познатиот невролог вели дека е големо охрабрување тоа што Шумахер се разбудил од кома после шест месеци.
„Тоа е неверојатно позитивна порака кога некој ќе се разбуди од кома после помалку од една година“, додава тој
Медицинските експерти и претходно предупредуваа дека еден од десет пациенти кои ќе минат толкав период во кома успеваат да закрепнат комплетно или да ги вратат поголем дел од своите ментални и физички капацитети.