Соединетите Американски Држави ќе ги прекинат сите барања за вакцинација против Ковид кога станува збор за влез во земјата, вклучително и патници од странство, на 11 мај, бидејќи на тој ден во САД завршува вонредната состојба поради корона вирусот објави Белата куќа.
Претставничкиот дом на САД во февруари гласаше за укинување на барањето повеќето странски патници кои пристигнуваат со авион да се вакцинираат против Ковид, една од ретките мерки за борба против КОВИД кои сè уште се во сила во Америка, според Ројтерс.
Минатиот јуни, администрацијата на претседателот Џозеф Бајден го укина задолжителниот негативен тест за коронавирус за патниците на авиокомпаниите, но препораката на американските центри за контрола и превенција на болести за задолжителна вакцинација за влез во САД остана на сила.