Роџер Федерер се врати од 0:2 во сетови и го победи Французинот Жилиен Бенето со 4:6, 6:7(3), 6:2, 7:6(6), 6:1 во третото коло на Вимболдон.
Иако под голем притисок, особено во 4-от сет, Швајцарецот успеа да остане смирен и да направи голем пресврт.
Федерер на два пати во 4-от сет сервираше за опстанок во мечот и иако Бенето во тај-брејк имаше сервис на 6-6, не успеа да приреди сензација и да го победи Роџер.
Во 5-от сет без дилема, Бенето падна и психички и физички и му ја олесни работата на Федерер.
„Исклучително тежок меч. Ох господе, ова беше брутално. Очигледно, беше потребна и малку среќа, која беше на моја страна. Се трудев и се борев со сета сила, до самиот крај. Тој играше врвен тенис. Ме доведуваше во недоумица во поголемиот дел на мечот. Не знаев што да одиграм. Тоа му е големо признание од мене, затоа што беше одличен“, изјави по мечот, Роџер Федерер.
„Кога губите 2:0 во сетови, најбитно е да останете смирени колку и да е тешко. Нормално е дека резултатот ќе ве оптерети, но немате премногу прилики да се вратите“, додаде Швајцарецот.
„Повторно покажа колку е голем, најголем! Ментално е како карпа. Губи два сета, а ништо не покажува“, рече францускиот тенисер Бенето.
