Ракометарите на Монпеље, меѓу кои и Никола Карабатиќ и Младен Бојиновиќ, се пуштени од притворот во Париз и треба да се појават пред судија.
Вкупно 16 лица, од кои девет поранешни и сегашни играчи на Монпеље, во неделата беа уапсени под сомнение за вмешаност во местење на натпревари.
„Постои голем сомнеж во непочитувањето на спортската етика“, изјави обвинителот Брајс Робин и додаде дека некои ракометари се блиско поврзани со обложувалниците и поради тоа е одлучено да бидат приведени.
Тој исто така додаде дека девојката на Лука Карабатиќ, призна дека се обложувала во име на играчите, кога е уапсена.
Според пишувањето на француските медиуми, во случај да бидат прогласени за виновни, ракометарите би можеле да бидат казнети со по шест натпревари суспензија и 15 илјади евра казна, а во случај да се докаже дека ги местеле натпреварите би можеле да одат во затвор и до пет години и да платат 75 илјади евра.