Екипите на Мајами и на Торонто обезбедија пласман во следната фаза од плеј офот од НБА лигата откако ноќеска во мајсторките беа подобри од ривалите и постигнаа победи.
Мајами славеше на домашен терен со убедливи 106:73 против Шарлот за триумф од 4-3 во победи, додека Торонто ја совлада Индијана со 89:84 за 4-3 во победи.
Во полуфиналето на „Исток“ двата тима ќе играат меѓусебе, а првиот дуел се игра на теренот на Торонто на 3.мај.
Шампионот Голден Стејт ја постигна првата победа во полуфиналето на „Запад“ против Портланд. Првакот славеше со 118:106, а имаше сигурно водство во текот на целиот натпревар. Клеј Томсон постигна 37 поени, а Дрејмонд Грин имаше „трипл-дабл“ 23 поени, 13 скокови и 11 асистенции. Голден Стејт поведе со 1-0.
Вечерва почнува серијата меѓу Кливленд и Атланта, а се игра и вториот натпревар Сан Антонио – Оклахома Сити (1-0 за Сан Антонио).