По интервенција на Грчката ракометна федерација (ОХЕ), Меѓународната ракометна федерација и Шпанската ракометна федерација, за помалку од 24 часа на сајтот на Светското првенство 2013 името на Македонија е сменето во БЈРМ, соопшти ОХЕ.
Федерацијата нагласува дека во соработка со надлежните органи на земјата ќе продолжи да го следи ова прашање и случувањата на Светското првенство, кое почнува утре во Шпанија.
На сајтот на ОХЕ е објавена и изјавата на нејзиниот претседател Пантелис Хаџијоану според кого „со години е позната чувствителноста на Федерацијата во ваквите случаи, брзите рефлекси и бескомпромисноста кога е во прашање националниот интегритет“.
– Грчката ракометна федерација многу пати покажа дека пред се го става националниот интерес и заштитата на нашата историја и нашите свети симболи, вели Хаџијоану и изразува благодарност до претседателот на Меѓународната ракометна федерација Хасан Мустафа што брзо одговорил на грчкото барање и го решил прашањето.
Македонската ракометна репрезентација која ќе настапи на Мундијалот во Шпанија, на официјалниот сајт на првенството прво беше претставена со уставното име.
