Во околината на манастирот Трескавец, кај Прилеп, денеска и утре се одржува петиот фестивал на искачување на карпи – болдеринг „Крали Марко“.
Мотото на Фестивалот е „Да се исчисти и да се искачи карпата“. Организатори на овој меѓународен фестивал се Спортско-качувачкото друштво „Златоврв“ и прилепската локална самоуправа, заедно со Македонската спортско-качувачката федерација и со УСАИД.
Најавено е учество на стотина гости од повеќе земји.
– Фестивалот полека станува традиција. Очекуваме 100-ина гости од Франција, Италија, Бугарија, Словенија и Србија и Македонија, изјави Христо Белокапоски од Спортско-качувачкото друштво „Златоврв“.
Официјалниот натпреварувачкиот дел на фестивалот почнува денеска во 10 часот.
Пределите околу Прилеп високо котираат на мапата на болдерингот и се смета дека на Балканот се најатрактивни за искачување на карпа.
– Формите на карпите овде се единствени и не може да ги најдете на друго место. Можеби слично место е Бафа на истокот од Турција, но за европските спортисти тоа е далечна дестинација. Прилеп, како препознатлива дестинација е на сите сајтови за болдеринг, вели Белокапоски.
За пет години колку што се одржува Фестивалот, на овие локации дошле илјадници спортисти.