Од 20 до 25 јуни во Скопје ќе се одржи меѓународниот детски тениски турнир „Cherry Cup Skopje“ кој е сличен на турнирите што се организираат во Белград Умаг и Дубровник.
Турнирот се организира по трет пат, а на него ќе учествуваат деца на возраст од 5 до 14 години кои ќе се натпреваруваат во седум категории. Во категоријата црвен тенис ќе учествуваат тенисери родени во 2013 година, во зелен и портокалов тенис ќе се натпреваруваат тенисери родени во 2011 година, а У11, У12 и У13 турнирите се наменети за тенисерите родени 2008, 2009 и 2010 година. Турнирот У14 е наменет за тенисери родени 2007 година.
Освен во турнирот за црвен тенис, во сите останати, ќе се одржат сингл и дубл натпревари.
Натпреварите ќе се играат во АТК премиум клубот во Скопје, а победниците и учесниците ќе добијат вредни награди.
Од 16 до 19 јуни, за оние кои ќе пристигнат пред официјалниот почеток на натпреварите организирана е подготвителна програма која опфаќа тренинзи, рекреативен дел, запознавање со Скопје и многу дружење. Планирано е да се одржат и образовни работилници за децата тенисери кои опфаќаат теми вон спортот.
„Cherry Cup Skopje 2021“ е дел од спортско-едукативниот хаб во регионот – Cherry sport. Целта е да се подигне статусот на детскиот тенис и да им се помогне на најмладите уште од најрана возраст да се вклучат во светските спортски движења.