За ракометната репрезентација на Македонија денеска е слободен ден, а по трите победи утре следува дербито во групата со Хрватска, селекција која исто така има три триумфи.
– Имаме малку време за подготовка, но тоа е така за нас и за сите други. Не очекува тежок натпревар против Хрватска, селекција која секое првенство е меѓу првите 3-4 репрезентации. Со трите победи дојдовме во ситуација да се бориме за првото место во групата со Хрватска и ќе пробаме да ја искористиме оваа шанса. Во оваа работа нема емоции, јас сум со Македонија и со моите играчи и ќе бидам среќен со позитивен резултат. До крајот ни остануваат уште два тешки натпревара. Хрватска доминира со одбраната, изјави селекторот Ивица Обрван.
На прес-конференцијата беше и Филип Миркуловски според кого полуконтрите и контрите се најсилното оружје на Хрватите.
– Не очекува неизвесен натпревар и борба за прво место во групата. Ќе треба да ги спречиме нивните контри и полуконтри. Треба да се обидеме да ја играме нашата игра како на отворањето со Тунис, истакна Миркуловски.
Натпреварот Македонија – Хрватска од 4.коло во Б групата на Светското првенство се игра утре со почеток од 17 часот.