Ова е можеби најубедливата победа на Рафаел Надал против големиот Роже Федерер. По само 1 час и 8 минути игра, во два освоени сетови 6:1, 6:3, Надал ја одбрани титулата на Мастерсот во Рим.
Првиот сет траеше само 23 минути. Федерер направи дури 15 неизнудени грешки наспроти двете на Надал, а имаше 5 винери. Шпанецот имаше 6 директни поени.
Иако во вториот сет Швајцарецот за момент ја подобри играта, Надал без проблеми го приведе мечот кон крајот.
Федерер имаше дури 32 неизнудени грешки, а Надал само 8.
Ова е 24-тата мастерс од вкупно 56 титули за Рафа и 20-та победа против Федерер од 30 меѓусебни дуели. По овој триумф Шпанецот ќе се искачи една позиција погоре. Од утре тој ќе биде четврти тенисер на светот.