На натпреварите закажани за вечерва од 19 часот во „Јасмин“ во Кавадарци и во „Градски Парк“ во Скопје, екипите на МЗТ Скопје Аеродром и Кожув ќе ја добијат првата шанса да го заверат пласманот во финалето на кошаркарскиот шампионат.
Со водство од 2-0 во сериите до три победи, МЗТ Скопје и Кожув гостуваат на Фени Индустри и Работнички.
Фени Индустри сезонава нема ниту една победа против актутелниот шампион МЗТ Скопје Аеродром во вкупно четирите одиграни средби (две во Суперлигата, една во Купот и една во плејофот), па повторно тимот предводен од трнерот Љупчо Малинков ќе има исклучително тешка задача против, главниот фаворит за титулата.
Во другото полуфинале од плеј-офот меѓу Работнички и Кожув, гевгеличани со победата на домашен терен во саботата дојдоа до водство од 2-0, кое со евентуална победа вечерва во „Градски Парк“ може да го претворат во прво првенствено финале во клупската историја.
Во историјата на независна Македонија ниту една екипа досега во плејофот не успеала да направи пресврт откако губела со 2-0.