Една победа ги дели кошаркарите на МЗТ Скопје Аеродром и на Кожув од Гевгелија до пласман во големото финале од македонскиот кошаркарски шампионат.
До првата победа во плеј-офот и водство од 2:0 во полуфиналната серија против Фени Индустри, бранителот на титулата МЗТ Скопје Аеродром стигна вечерва во СЦ „Борис Трајковски“ по триумфот од 101:84.
Победникот беше решен во третиот период кој домашните го добија со 13 поени разлика (34:21). Во другите четвртини беше 24:21; 24:26 и 19:16.
Дамјан Стојановски со 25 постигнати поени беше најзаслужен за победата на МЗТ.
Кожув кој исто како и МЗТ во полуфиналето стартуваше со предност од 1:0 во серијата прв до три победи, поведе со 2:0 против Работнички и се најде на чекор до пласман во големото финале.
И овој дуел беше решен во второто полувреме, но за разлика од средбата во Скопје, клучни во Гевгелија беа последните 10 минути кои Кожув ги реши во своја корист со 25:17 за конечна победа од 79:73.
Игор Мијајловиќ со 22 реализирани поени ги предводеше гевгеличани до вечерашната победа.
Следните натпревари се закажани за во вторник на 14 мај.