Младата кадетска репрезентација на Македонија за кошаркарки до 16 години го запиша првиот пораз на домашен терен во рамки на подготвителниот период.
Избраничките на Стојна Вангеловска ги одмерија силите против кошаркарките од Израел, а беа доминантни на паркетот во првиот дел од натпреварот, но брзата транзиција на противникот беше најголем непријател на овој натпревар. Во финишот, Израел славеше со 63:71 по четвртини 16-16, 18-17, 13-15, 16-23.
Со по 20 постигнати поени Николиќ и Митрева беа двете најефикасни кошаркарки во нашата репрезентација.
Вечерва повторно во малата сала на СРЦ „Кале“ со почеток од 20 часот, овие две селекции ќе одиграат уште еден меч.
Утре, Израелките ќе играат против Бугарија, а во понеделник турнирот ќе биде заокружен со дуелот Македонија – Бугарија.
Овие пријателски натпревари се дел од подготовките за Европското првенство (Дивизија Б) кое од 17 до 26 август ќе се одржува во Скопје.