Во пресрет на Светското првенство во ракомет во Шпанија хрватски „Индекс“ направи листа на седумина млади ракометари што ги смета за иднина на светскиот ракомет. Меѓу нив е и левото крило на македонската репрезентација Дејан Манасков.
Покрај Манасков, на листата се наоѓаат Филип Ивиќ (Хрват, голман – Загреб), Дејан Манасков (Македонец, лево крило – Металург), Павел Пачковски (Полјак, десно крило – Висла Плоцк), Михаел Марсениќ (Србин, пикер – Партизан), Арон Палмарсон (Исланѓанец, лев бек – Кил), Ксавиер Барачет (Француз, десен бек – Атлетико Мадрид) и Пабло Симонет (Аргентинец, среден бек – Енкантада).
Како резерви се наведени: Матеја Габер (пикер – Горење), Ваел Џалуз (лев бек – Кил) и Стефан Рафн Сигурмансон (лев бек – Кил).
„Индекс“ прогнозира дека Македонија ќе го освои третото место во групата во која се натпреварува во групната фаза на Светското првенство, и оти ќе се пласира во осминафиналето. На табелата пред Македонија, според „Индекс“ се Данска и Исланд, а со послаби резултати Исланд, Русија, Катар и Чиле.
Македонската ракометна репрезентација, на денешната прес-конференција на неполни три дена до почетокот на Светското првенство, најави дека очекуваат најмалку пласман во осминафиналната фаза, а потајно се надеваат и на освојување медал.
– Оптимистички сме расположени и со позитивни мисли заминуваме во Севиља. Посакуваме со две победи да го почнеме Мундијалот. Веќе обезбедивме снимки од подготвителните натпревари на Чиле и Катар. Одиме без калкулации на секој натпревар. Реалноста е пласман во 1/8 финалето, а желба е медал, истакна селекторот Звонко Шундовски.
Што се однесува до натпреварите против европските репрезентации од нашиот состав сметаат дека најголеми шанси за успех имаме против Исланд, а фаворитската улога во групата се препушта на Данска и на Русија.