Селекторот на македонската ракометна репрезентација, Кирил Лазаров вели дека тешката победа над Турција во последниот натпревар од евроквалификацискиот циклус му покажал многу работи што во иднина ќе влијае на тоа кого ќе повикува во националниот тим.
„Ние бевме фаворити на хартија, тоа сите го знаевме и свесни дека сме фаворити. Но, Турција не беше иста, имаше двајца до тројца играчи повеќе. Во изминатите два дена бев доста нервозен, не бевме фокусирани и коцентрирани, си мислевме дека се е завршено. Мора да сме спремни за борба со секој противник, од почеток до крај. Од минус четири, дојдовме до плус четири, ме радува пресвртот, увидов на некои работи дека во иднина треба добро да размислам кого ќе го повикам во националниот дрес. Јас пробувам да им дадам шанса на сите, меѓутоа во иднина ќе внимавам, ми се отворија очите, затоа што работи кои се повторуваат, треба да се решаваат. Честитки за момците, се изборија за победата машки. Не е исто да се заврши со пораз и со победа. Она кое го направивме ќе ни служи многу, но и доста работи ќе мора да менуваме. Не е дека не сум задоволен, туку имам само визија плус“, изјави Лазаров.
Македонија со пласманот на ЕП 2024 го продолжи континуитетот со настап на големите натпреварувања и уште еден јануари земјата ќе пулсира во ритамот на ракометот.