Кошаркарките на Кросиг со победа над актуелниот шампион на домашен терен во уште еден тврд натпревар со малку поени, ја задржаа неизвесноста во финалната серија од плеј-офот изедначувајќи го резултатот на 1-1 во победи.
Кристина Семереди со одлична игра во завршницата од натпреварот беше носител на победата на Кросиг од 50:45 на натпреварот одигран вчеравечер во СЦ „Борис Трајковски“.
Ниту една од двете екипи во ниту еден момент не успеа да стигне до двоцифрена разлика, а во решавачките моменти од натпреварот, Кросиг ја имаше Кристина Семереди која ја превзема одговорноста и со неколку прецизни шутеви донесе победа за својата екипа.
Таа го заврши натпреварот со 24 поени, 6 скокови и 2 украдени топки како најдобар поединец, а меѓу поистакнатите во победничката екипа беа и Елена Раденковиќ со 14 поени и 8 скокови и Ана Живковиќ со 9 поени, 7 скокови, 2 украдени топки и по 3 блокади и асистенции.
Кај Вигор, Славица Димовска и Александра Стојановска беа најдобри со искомбинирани 22 поени и 15 скокови. Сања Раденковиќ постигна 10, сите во првото полувреме од мечот.
Следниот меч од финалната серија до три победи се игра в сабота, а домаќин ќе биде Вигор. До крајот на серијата ќе се одиграат најмалку уште две средби, а доколку е потребна и мајсторка.