Женската кошаркарска репрезентација на Македонија на убедлив начин оствари пласман во финалето на Европското првенство за мали земји кое се одржува во салата „Билјанини Извори“ во Охрид. Ова е епилогот по денешното полуфинале во кое македонските кошаркарки ја победија Шкотска со 80:61 (по четвртини 23:22; 25:9; 13:18 и 19:12).
Најефикасни во македонската репрезентација беа Славица Димовска со 18 поени, Моника Гавриловска постигна 17, а Ана Тантуровска даде 16 поени.
За Македонија ова беше четврта победа на првенството во исто толку натпревари, откако во групната фаза избраничките на селекторот Лидија Милкова ги совладаа Гибралтар, Австрија и Велс.
Кој ќе биде противникот на „црвено-жолтите“ во утрешното финале ќе се знае вечерва по одигрувањето на вториот полуфинален дуел меѓу Малта и Австрија.