Македонската кошаркарска репрезентација претрпе убедлив пораз од Русија со 80:61 во првиот од двата пријателски натпревари на мини-турнејата во Литванија.
Попладнево во Каунас избраниците на Марјан Лазовски се држеа одлично по првите две четвртини, а на полувремето имаа предност од пет поени (35:30).
Сепак, подмладениот состав на „црвено-жолтите“, кои за Литванија заминаа без капитенот Антиќ и искусниот Гечевски, кои добија продолжен одмор, како и без претходно отсутните Илиевски (поради повреда) и Мекејлеб (клупски обврски), во вториот дел паднаа со темпото, губејќи ги третиот и четвртиот период со 14:26, односно 12:24, за на крајот убедливо да загубат со 19 поени разлика.
За два дена кошаркарите ќе го одиграат вториот контролен натпревар во рамките на подготовките за квалификацискиот турнир во Каракас за ЛОИ во Лондон, против домаќинот Литванија.