Селектор на македонската фудбалска репрезентација Чедомир Јаневски е оптимистички расположен пред утрешното заминување за Загреб, каде в петок на квалификацискиот дуел против домаќинот Хрватска се надева на успешно деби на кормилото на „црвено-жолтите“.
„Задоволен сум од сработеното на четирите тренинзи од понеделникот до денеска. Според она што го видов, имам причина да се надевам на добар резултат на дуелот со Хрватска“, изјави Јаневски на денешната прес-конференција.
Јаневски истакна дека е извршена целосна анализа на играта на противникот, а засега единствено непознато за него останува изгледот на првите 11 во домашниот тим.
„Почетната формација е променета, а тоа се однесува и на улогите на одредени играчи. Советувано им е како да се однесуваат и кога го имаат поседот на топката и кога таа се наоѓа кај противникот“, додава Јаневски.