Кошаркарскиот клуб Кожув од Гевгелија за првпат во својата историја ќе игра во финалето на плеј-офот од македонското првенство.
По вечерашниот триумф над Работнички со резултат 78:72, гевгеличани со вкупни 3-1 во победи обезбедија учество во борбата за шампионската титула.
Во текот на целиот натпревар одигран во салата „26 Април“ во Гевгелија, Кожув го контролираше резултатот и во ниту еден момент не му дозволи на противникот да ја доведе во прашање победата вредна големо финале.
Првите 10 минути домаќинот ги заврши со водство од 26:13 кое на полувреме изнесуваше 48:33. На високите 15 поени по третата четвртина им беа додадени уште пет (19:14) за убедлива предност од 67:47 пред почетокот на последниот период.
И кога се очекуваше последната четвртина да биде само формалност, Работнички направи серија од 13:0 во периодот од 30 до 35.минута, на 44 секунди се доближи и на минус четири (74:70), но сепак немаше сили за целосен пресврт.
Најзаслужни за победата на Кожув беа Игор Мијајловиќ со 19, Дарко Радуловиќ со 13, Александар Штериев и Миладин Пековиќ со по 12 поени.
Кај Работнички со реализација се издвоија Џон Шарпер кој постигна 20 поени и Мохамед Абукар со 16.
Остана традицијата во македонските првенства од независна Македонија ниту една екипа која губела со 2-0 во победи да не успее да направи целосен пресврт и да го елиминира противникт.
Финалната серија МЗТ Скопје Аеродром – Кожув започнува в недела во 19 часот, а домаќин е тимот од Јане Сандански кој воедно е и бранител на шампионската титула.