Новак Ѓоковиќ се пласираше во осминафиналето на Отвореното првенство на САД победувајќи го Британецот Камерон Нори со 6-4, 6-7, 6-2, 6-3 по помалку од три часа игра иако српскиот тенисер имаше проблеми со повреда.
Имено, по првиот сет, Ѓоковиќ побара медицинска помош поради проблем со грбот, а во текот на целиот натпревар изгледаше како понекогаш да има многу болки. Сепак, не сакаше да открива премногу по натпреварот.
– Во ред е. Не сакате да откривате премногу на ривалите кои го гледаат ова – рече тој и додаде:
– Добар сум, млад како и секогаш, силен како и секогаш. Ова е Њујорк, дури и ако чувствувате нешто физички, енергијата едноставно совладува – порача тој.
Ѓоковиќ ќе игра во осминафиналето против квалификантот Јан-Ленард Штруф.