Фудбалерот на Реал Мадрид, Давид Алаба ќе конкурира за составот на претстојниот завршен турнир од Суперкупот на Шпанија, соопшти денеска мадридскиот клуб. Алаба е надвор од теренот повеќе од една година откако ги скина предните вкрстени лигаменти на левото колено на 17 декември 2023 година на мечот против Виљареал.
Австрискиот фудбалер мораше да оди на две операции поради тешка повреда на коленото, а опоравувањето траеше подолго од првично планираното. Алаба (32) почна да тренира на крајот од минатата година, а тренерот на Реал, Карло Анчелоти реши да го вклучи во списокот на патници, кои ќе се пријават за составот на завршниот турнир од шпанскиот Суперкуп што ќе се игра во Џеда.