Францускиот тим Ница се најде во центарот на скандал откако двајца од нивните клучни играчи, Јереми Бога и Терем Мофи, беа физички нападнати од сопствените навивачи. И двајцата завршија на боледување по инцидентот, а против сторителите беа покренати правни постапки, што ја влоши ситуацијата во клубот уште повеќе.
Сè се случи во неделата навечер, по враќањето на тимот од Лориен, каде што го забележаа својот шести последователен пораз (1:3). Кога автобусот пристигна во тренинг центарот, ги пречекаа 400 лути навивачи, подготвени да го изразат своето незадоволство, но тоа се претвори во насилство.
Според француските медиуми, Бога и Мофи беа цел на тупаници, клоци, па дури и расистички навреди. Некои удари беа насочени кон гениталиите.
По нападот, Бога доби пет дена боледување, додека Мофи е надвор од игра до следната недела.
„Ова е незамисливо и далеку над границите на она што е прифатливо“, ги пренесоа француските медиуми зборовите на луѓе кои го виделе инцидентот.
Спортскиот директор Флоријан Морис буквално мораше да биде спроведен низ безбедносните кордони, додека тренерот Франк Хаис, парадоксално, доби поддршка од навивачите.
Капитенот Мелвин Бард и Софијан Диоп избегаа неповредени, но повеќето играчи беа „шокирани и трауматизирани“, според ESPN.
Вчера Ница издаде официјално соопштение:
„Ја разбираме фрустрацијата на навивачите од лошите резултати, но видените ексцеси се целосно неприфатливи. Неколку членови на клубот беа физички нападнати. Клубот целосно ги поддржува и ги осудува овие дела на најсилен можен начин“.
Во меѓувреме, Бога и Мофи се појавија во полициската станица и поднесоа пријава против напаѓачите.
Истрагата е во тек.