Репрезентацијата на Хрватска го освои третото место и бронзениот медал на Свесткото ракометно првенство кое се одржува во Шпанија.
Хрватските ракометари вечерва во „Палау Сант Жорди“ во Барселона со 31:26 ја совладаа селекцијата на Словенија во малото финале.
Првото полувреме помина во изедначена игра и неколку изедначувања на резултатот за по 30 минути игра Хрватите на одмор да одат со плус еден – 14:13.
Победникот беше решен во почетните минути на вториот дел кога Хрватска направи серија од 7:0 за водство од 21:14 во 42.минута.
Домагој Дувњак и Иван Чупиќ со по осум голови беа најефикасни играчи во победничкиот состав.
Со освоеното трето место Хрватска ја продолжи низата бронзени медали на големите натпреварувања, откако бронза освои и на последното Европско првенство во Србија и на Олимпијадата во Лондон.
Финалниот дуел на 23.от Мундијал ќе се одигра утре со почеток од 17 часот и 15 минути. За златото ќе се борат домаќинот Шпанија и европскиот првак Данска.