Со натпреварот Фени Индустри – Куманово одигран синоќа во Кавадарци се комплетира 11.коло во Првата македонска кошаркарска лига. Победа на дербито со резултат 93:91 оствари екипата на Фени Индустри дури по продолжението, откако регуларниот дел заврши без победник 76:76.
Со 28 поени и 17 скокови, Бојан Трајковски беше најдобар поединец кај Фени Индустри, додека на Куманово не му помогнаа нити расположените Александар Костоски со 31 поен и Урош Луковиќ кој имаше „дабл-дабл“ учинок од 21 поени и 12 скокови.
Екипата на Лирија ја потврди фаворитската улога во дуелот со Струмица славејќи победа со 88:82.
Во победничкиот тим дури петмина кошаркари имаа двоцифрен број на поени, а предводници беа Диме Тасовски (17) и Балша Радуновиќ (15) кој заедно имаа учинок од 32 поени и 19 скокови.
Тони Грнчаров со 19 поени беше најдобар стрелец во поразената екипи, но и на натпреварот.
На натпреварите одиграни во петокот исто така победи забележаа домашните екипи.
Кожув беше подобар од Вардар со 82:62, а Работнички со 49 поени разлика (108:59) го победи Пелистер Спорт.
Табела: Кожув 20 бодови, Лирија 19, Фени Индустри 19, Куманово 17, Работнички 16, Струмица 16, Вардар 13 и Пелистер Спорт 12.