Македонскиот центар за култура и развој како национален ФАРЕ координатор и Фудбалската федерација на Македонија ја презентираа годинешната програма со активности опфатени во ФАРЕ Акционата недела за борба против национализмот и расизмот во фудбалот.
– ФАРЕ акционата недела за борба против насилствата на спортските терени, национализмот и расизмот се организира во над 50 земји и во неа учествуваат повеќе од 270 организации, фудбалски клубови и фудбалски федерации од целиот европски континент. Основна цел на кампањата е редовно, секој октомври да се привлече вниманието на вкупната спортска јавност за важноста на фер-плејот и за активен однос во надминување на сите видови на насилство и дискриминација на спортските терени. Оваа година, тема на кампањата се бегалците и нивно вклучување преку фудбалот во полесно интегрирање во новата средина. Во Европа веќе има милион и фудбалските организации и асоцијации во повеќе од 20 земји веќе имаат конкретни активности за нивно вклучување преку фудбалот во општеството, изјави Нелко Нелковски, претседател на МЦКР и национален ФАРЕ координатор.
Од ФФМ се обрати Енвер Сулејмани, заменик генерален секретар во федерацијата.
– ФФМ дава целосна поддршка на сите активности поврзани со фер-плејот и борбата против насилствата, национализмот и расизмот на фудбалските терени. Ние како федерација сме обврзани да се грижиме за надминување на сите видови недоследности и нарушувања. ФФМ активно учествува во програмата на УЕФА против расизмот и дискриминацијата во фудбалот а го истакнуваме и задоволството од соработката со МЦКР. Повикуваме сите заедно, фудбалерите, клубовите, навивачите, судиите, невладините организации и сите граѓани да придонесеме во развојот на навивачката култура во нашата земја и да станеме пример за достоинствено однесување, истакна Сулејмани.
Како активност оваа година, МЦКР и ФФМ организираат покажување на црвени картони и изнесување на банери, пред почетокот на сите натпревари во Првата фудбалска лига, на кои ќе пишува „НАЦИОНАЛИЗМОТ И РАСИЗМОТ НАДВОР ОД ФУДБАЛОТ“.