Македонската ракометна репрезентација попладнево го одржа единствениот тренинг на слободниот ден за нашите играчи меѓу двете кола.
По двете стартни победи, следуваат дуелите со трите европски репрезентации во рамките од Б групата. За пласман во следната фаза е потребно да се освои барем еден бод на следните натпревари. Шанса за осминафинале имавме и денеска, но дуелот меѓу Исланд и Тунис заврши без победник 22:22, па двете селекции пред се Тунис останаа со шанса за осминафиналето бидејќи и двете до крајот ќе играат против Ангола.
– Ја знаеме играта на Словенија. Нивната силна страна е позицијата среден бек во нападот и транзицијата. Ќе мораме да ја запреме. Треба да бидеме пред се многу борбени и со тоа ќе имаме шанси за посакуваниот резултат. Со добрата зонска одбрана можеме многу да направиме пред се да го неутрализираме нивниот напад и контрите и полуконтрите. Инаку, точно е дека ќе беше убаво да бевме осминафиналисти, изјави селекторот Лино Червар на денешниот тренинг.
Дуелот Македонија – Словенија се игра утре од 17:45 часот.
По некомплетното трето коло Словенија, Македонија и Шпанија се на врвот на табелата со по 4 бодови, Исланд и Тунис имаат по еден бод, а Ангола е без бод.