Екипите на Билбао Баскет и на Локомотив Кубан ќе играат во финалето на Еврокупот, откако во полуфиналните пресметки беа поуспешни од своите противници.
Шпанскиот претставник Билбао Баскет синоќа убедливо со 75:53 го победи украинскиот Будивелник во реванш-полуфиналната средба. И на првиот дуел, одигран на теренот на Будивелник во Киев, победи шпанскиот тим со 93:83.
На вториот реванш дуел од полуфиналната пресметка меѓу Локомотив Кубан и шпанската екипа Валенсија, вчера во Краснодар победија гостите од Шпанија со 68:63, но тоа не им беше доволно за конечен успех поради поразот на свој терен со резултат 97:87.
Финалето од второто по квалитет европско клупско кошаркарско натпреварување – Еврокупот, ќе се одигра на 13 април во Шарлроа (Белгија).