Четвртфиналната фаза во кошаркарската Евролига стартува вечерва од 20 часот со натпреварот во „Палау Блауграна“ меѓу домашната Барселона и грчкиот претставник Панатинаикос.
Шпанскиот тим ја има улогата на фаворит, не само во ова четвртфинале туку важи и за еден од главните претенденти за шампионскиот тофеј. Барселона во 24-те натпревари во групните фази сезонава само двапати беше поразена (ЦСКА Москва и Химки) и имаше убедливо најдобар биланс од сите екипи во елитното натпреварување.
За пласман на „Фајнал-фор“ турнир во Лондон, ќе бидат потребни три победи во серијата подобар од пет, а покрај вечерашниот натпревар и следната средба во четврток ќе се игра во Барселона, потоа предвидени се две средби во Атина, а евентуалната мајсторка повторно ќе се игра во Шпанија.
Останатите три дуели од четвртфиналето ќе се играат утре, а двојките се: ЦСКА Москва – Каха Лаборал, Олимпијакос – Анадолу Ефес и Реал Мадрид – Макаби.