Претседателот на Азиската фудбалска конфедерација (АФЦ), шеикот Салман бин Ебрахим Ал-Калифа, остро го критикуваше планот на ФИФА да продаде удел во Светското првенство на приватни инвеститори, оценувајќи дека таквиот потег е „целосно неприфатлив“ и дека ја поткопува структурата на светскиот фудбал.
Во писмо испратено до сите 47 национални фудбалски сојузи-членки на АФЦ, Ал-Калифа изрази сериозна загриженост поради тоа што ФИФА не ги консултирала континенталните конфедерации пред јавно да го претстави својот предлог.
ФИФА во вторникот објави план за формирање комерцијална компанија вредна 17,5 милијарди евра, која би управувала со комерцијалните права на Светските првенства и други натпреварувања. Предлогот веднаш предизвика негативни реакции кај повеќе континентални конфедерации, меѓу кои и УЕФА и АФЦ.
„Со голема загриженост и разочараност констатираме дека ФИФА во ниту една фаза не се консултираше со нас пред јавното објавување на овој предлог“, наведува Ал-Калифа во писмото.
Тој истакнува дека АФЦ не добила никаква детална правна, финансиска или управувачка анализа на проектот, ниту проценка за неговите можни последици.
„Тоа е целосно неприфатливо. Длабоко сме загрижени затоа што едностраните потези на ФИФА ги поткопуваат темелите на континенталниот фудбал, кои се засноваат на солидарност, соработка и транспарентност“, се наведува во писмото.
Азиската конфедерација, со седиште во Куала Лумпур, смета дека ваков проект не може да се реализира без согласност и поддршка од сите шест континентални конфедерации.
Дополнително, Ал-Калифа го критикуваше и краткиот рок што ФИФА им го поставила на националните сојузи. Претседателот на ФИФА, Џани Инфантино, во писмо до сите 211 национални федерации навел дека секоја ќе добие по 35,12 милиони евра доколку го прифати предлогот до 19 септември.
„Изненадени сме што временската рамка остава толку малку простор за разгледување на предлог од ваква важност. Вакви одлуки никогаш не треба да се носат набрзина“, порача претседателот на АФЦ.
Поради тоа, тој ги повика сите национални сојузи во рамките на АФЦ засега да не донесуваат никаква одлука, сè додека не завршат дополнителните разговори со ФИФА и не се направат сите потребни анализи.
„Остануваме целосно посветени на конструктивна соработка со ФИФА и со сите наши членки, со цел да се заштитат интересите на фудбалот и неговиот понатамошен развој врз принципите на доверба, транспарентност и единство“, се наведува во писмото.