ФИБА Европа го соопшти делегирањето за Евробаскетот кој во 2013 година ќе се одржи во Словенија, а меѓу 40-те судии кои ќе ја делат правдата на континенталниот шампионат, се наоѓа и македонскиот кошаркарски судија, Александар Милојевиќ.
За Александар Милојевиќ, кој веќе четири години по ред е избиран и за најдобар судија во нашата земја, овој Евробаскет ќе биде трет по ред, откако судеше и на шампионатите во Полска во 2009 и Литванија 2011 година. На последното Европско Првенство во 2011 година, Милојевиќ по успешно минатата прва фаза, судеше и во втората групна фаза на шампионатот.
„Секако дека сум пресреќен со оваа номинација“- вели кратко Александар Милојевиќ и додаде:
„Сметам дека за овој мој успех големо влијание има и одличниот пласман на нашата репрезентација на последниот Евробаскет. Се надевам дека ќе ја оправдам довербата и посакувам заедно со репрезентацијата да останеме и до самото финале во Словенија“
Александар Милојевиќ покрај на сениорските, редовно со години наназад е номиниран и на младинските Европски првенства под организација на ФИБА Европа. Што се однесува до меѓународните натпревари на клупско ниво, правдата ја дели на дуелите од Евролигата, Еврокупот, АБА лигата, а има судено и на Фајнл Фор турнирот на Еврочелинч Купот.