Новото Собрание на Косово, произлезено од вонредните парламентарни избори одржани на 6 октомври, ја започна попладнево, нешто по 15 часот, својата конститутивна седница.
Седницата, согласно собранискиот деловник, ја води највозрасниот пратеник, Јахја Кока, заедно со најмладата пратеничка, Фјола Ујкани, обајцата од Движењето Самоопределување (ВВ).
На почетокот на седницата, на која присуствуваат 111 од 120-те избрани пратеници, беше избрана Комисијата за верификување на пратеничките мандадти, по што е дадена пауза од 15 минути.
Седницата ја следат и повеќе амбасасдори акредитирани во Косово.
Според дневниот ред, Собранието денеска треба да го избере својот претседател и потпретседателите, но извесно е дека тоа нема да се случи, со оглед дека двете партии победнички на октомвриските избори, ВВ на Албин Курти и Демократскиот сојуз на Косово (ЛДК) на Иса Мустафа, се уште не се договорија за формирање заедничка влада.
Според неофицијални најави, по верификувањето на мандатите и конституирањето на седмото по ред Собрание на Косово, се очекува седницата да биде прекината и да продолжи кога ВВ и ЛДК ќе постигнат договор.
Двете досега опозициски партии од порано објавија дека се договориле за програмата на идната заедничка влада, која ќе ја води Курти, меѓутоа до застој во преговорите дојде откако ЛДК истапи со барање да ја преземе функцијата претседател на државата, откако во април 2021 година ќе му заврши мандатот на актуелниот претседател Хашим Тачи.