Пред Посебното одделение за организиран криминал при Вишиот суд во Белград, денеска беше донесена и јавно објавена пресуда во голем случај против членови на озлогласениот „Балкански картел“.
Обвинетите Слободан Костовски, Никола Стојадиновиќ, Небојша Субин и Бојан Копитовиќ беа прогласени за виновни за нелегален шверц на повеќе од две тони кокаин, кој беше запленет на 24 август 2024 година во Атлантскиот Океан.
По завршувањето на постапката, судскиот совет изрече исклучително високи затворски казни за оваа организирана криминална група, а Костовски, Стојадиновиќ и Субин веднаш беа задржани во притвор за да се спречи нивно бегство.
Организаторот на оваа група, Слободан Костовски, беше осуден на максимална затворска казна од 20 години, додека Никола Стојадиновиќ доби единствена затворска казна од 18 години.
Небојша Субин беше осуден на единствена затворска казна од 14 години, а Бојан Копитовиќ доби казна од 7 години затвор, пренесе „Телеграф“.
Четворицата осудени во првостепена постапка беа обвинети за сторено кривично дело неовластено производство и пуштање во промет на наркотични дроги како организирана криминална група во периодот од март 2022 година до 24 август 2024 година, делувајќи како исклучително организиран и опасен огранок на „Балканскиот картел“.
Потсетуваме дека во меѓународните води на Атлантскиот Океан, на едрилица пресретната на 24 август минатата година, беа запленети околу два тона исклучително чист кокаин.
Во тој момент, со едрилицата управувале еден украински и еден чешки државјанин, кои, според сомневањата, биле директно ангажирани и организирани од штотуку осудениот Костовски.
Инаку, тој бил во бегство откако успеал да избега од затвор во Бразил, поради што со години за него постоела активна „црвена потерница“ од Интерпол.
Оваа организирана криминална група во наведениот период развила цела мрежа и организирала транс океански транспорт на кокаин за понатамошна дистрибуција и продажба на европскиот пазар.
Тие обезбедувале луксузни јахти погодни за долги пловења, директно стапувале во контакт со јужноамерикански продавачи на наркотични дроги, организирале точни локации за преземање и безбедно истоварување на кокаинот, како и локации за негово криење, додека за самото патување ангажирале екипаж составен од Чех и Украинец, кои на крајот биле фатени на дело во срцето на Атлантикот.