Во Специјализираните совети на Косово во Хаг, во вторник, 17 ноември, ќе се одржи рочиште против поранешниот претседател на Косово, Хашим Тачи; поранешниот шеф на КИА (Косовска разузнавачка агенција), Башким Смакај; поранешниот градоначалник на Малишево, Исни Киљај; поранешниот министер за правда, Хајредин Кучи; и Фадиље Фазљиу, за кривичното дело „попречување на правдата“.
Според обвинението потврдено на 29 ноември 2024 година, Тачи и останатите се товарат за кривични дела поврзани со наводи за незаконски обиди за влијание врз сведочењата на сведоци во судскиот процес за воени злосторства.
Во обвинението се наведува дека во периодот од 12 април до 2 ноември 2023 година, Тачи им пренел на Смакај, Киљај, Фазљиу и Кучи доверливи информации во врска со сведоците на Канцеларијата на специјализираниот обвинител, како и упатства за тоа како да влијаат врз нивните сведочења.
Обвинителството, исто така, тврди дека Тачи координирал три одделни групи со цел да влијае врз сведоците во процесот за воени злосторства.
Против Тачи се поднесени три точки од обвинението за обид за попречување на службени лица во вршењето на нивните службени должности, четири точки за нарушување на тајноста на постапката и четири точки за непочитување на судот.
Истовремено, Смакај, Киљај и Фазљиу се товарат по две точки од обвинението, додека Кучи се товари по две точки за непочитување на судот.
Во завршниот збор, Обвинителството побара Тачи да биде осуден на шест години затвор, при што времето поминато во притвор да не се смета за дел од евентуалната казна.
За останатите сообвинети беа побарани поблаги казни: три години затвор за Башки Смакај, Исниј Киљај и Фадиљ Фазљиу, додека за Хајредин Кучи беше побарана казна од девет месеци.
Според Обвинителството, постапките на Тачи – со кои тој се обидел да влијае врз сведоците во главниот предмет, во кој е обвинет за воени злосторства и злосторства против човештвото заедно со Кадри Весељи, Јакуп Красниќи и Реџеп Селими – се докажани преку 28 снимки направени за време на девет посети на Притворскиот центар во Хаг, во текот на четири месеци.
На 16 септември оваа година, Тачи беше осуден на 25 години затвор во судскиот процес против поранешните лидери на ОВК.