За помалку од два месеца, мобилните тимови на Националната служба за јавно здравје на Грција направиле 41.785 тестови, објави денес министерот за здравство на Грција Василис Кикиљас преку неговиот официјален профил на Твитер.
„Во рок од 50 дена, мобилните групи на Националната служба за јавно здравје во 2.449 случаи земаа 41.785 примероци. Продолжуваме со интензивно земање примероци по случаен избор, засновани на научниот план и со цел дополнително зајакнување на чувството на здравствена безбедност за сите нас,“ напиша министерот.
Мобилните единици, во соработка со невладини организации, меѓу другото, спровеле и тестирања на локалното население на повеќе мали и оддалечени грчки острови во пресрет на туристичката сезона.
Според официјалните податоци, од почетокот на епидемијата заклучно со вчера, во Грција се направени вкупно 283.146 тестови, регистрирани се 3.266 позитивни случаи на Ковид-19, а починаа 190 лица.