Српскиот претседател Александар Вучиќ нема да оди во Брисел на самитот ЕУ-Западен Балкан.
„Првпат по 13 или 14 години, ниту јас ниту некој друг нема да одиме на таа меѓувладина конференција. Никој нема да ја претставува Република Србија, па затоа Западниот Балкан ќе биде без Република Србија“, рече Вучиќ.
Тој изјави дека донел таква одлука за да никој друг не биде виновен и за да не трпи никаков притисок врз Владата.
Тој рече дека разговарал со голем број европски лидери во претходните 24 часа.
„Бескрајно сум благодарен за почитта што ја покажаа Урсула фон дер Лајен и Антонио Кошта кон Србија. Исто така, сум благодарен и на претседателот Макрон, со кого разговарав синоќа. Верувам дека сè што правам, го правам за граѓаните на Србија. Без оглед на фактот што знам дека оваа одлука ќе предизвика критики, и во Брисел и од оние кои секогаш критикуваат, дури и кога не знаат што точно критикуваат. Верувам дека со ова ја штитам Република Србија и нејзините интереси, бидејќи мора да покажеме што сме направиле, а многу сме направиле“, рече претседателот.
Тој повтори дека Србија ќе го продолжи својот европски пат додека тој е претседател, а потоа, како што рече, ќе видиме.