Силен дожд го погоди јужниот дел на Хрватска, каде што е во сила црвена временска тревога, а во Метковиќ наврнаа рекордни 162 литри дожд на квадратен метар за десет часа.
Пожарникарите интервенираа на неколку локации и беа ангажирани во испумпување на голема количина вода што го загрози сообраќајот и инфраструктурата во градот.
Во раните утрински часови беше поплавен и автопатот А1, јавуваат хрватските медиуми.
Силна бура го погоди и Дубровник, каде што обилните дождови на градските улици создадоа водопад во градот.
Пожарникарите имале шест интервенции во Дубровник, од кои повеќето се однесувале на отстранување дрвја и гранки од патиштата, испумпување вода од згради, објавува Срна.
Според „Слободна Далмација“, екстремни 103 литри дожд на квадратен метар наврнале во Подгора кај Макарска.
Пообилни грмотевици има и во областа на Имотска крајина, Вргорац, Метковиќ, Сињ.
Обилниот дожд што трае цел ден создава проблеми на многу патишта.