Серија од четири земјотреси во период од само четири минути ја погоди Грција, во поширокото подрачје на Халкида, предизвикувајќи вознемиреност кај граѓаните.
Според Европско-медитеранскиот сеизмолошки центар (EMSC), најсилниот потрес бил со јачина од 5,2 степени според Рихтеровата скала.
Првиот земјотрес бил регистриран во близина на Мандуди. Иако првично беше објавено дека имал магнитуда од 5,3 степени, EMSC подоцна ја коригираше информацијата и соопшти дека јачината изнесувала 4,8 степени.
Во следните неколку минути следуваа уште три потреси со магнитуда од 4,3, 5,2 и 5,0 степени.
Епицентрите биле лоцирани во близина на Лимни, додека хипоцентрите се наоѓале на длабочина меѓу 5 и 10 километри под површината на земјата.
Земјотресите силно се почувствувале и во Атина, а граѓаните на социјалните мрежи сведочат за силно тресење.
„Лустерите се нишаа, радијаторите се тресеа и ѕвечеа“, „Силно се почувствува и во Атина“, „Во Халкида навистина силно тресеше“, се дел од коментарите на очевидци.
Според првичните информации, земјотресите предизвикале материјална штета, но нема пријави за повредени лица. Противпожарните служби вршат патроли во поширокиот регион и работат на расчистување на одрони и камења од патиштата.