Летовите од аеродромот во Катанија на Сицилија ќе бидат прекинати до сабота попладне поради вулканскиот пепел предизвикан од активноста на Етна. Поради тоа, во текот на претходната недела беа откажани или пренасочени стотици летови, соопшти операторот на аеродромот SAC.
Според претходната одлука, летовите од аеродромот во Катанија требаше да бидат прекинати до петок во 2 часот наутро.
Сите пристигнувања и заминувања на овој аеродром, кој е петти најфреквентен во Италија според бројот на патници, ќе бидат прекинати до 14 часот на 15 август, односно до 12 часот по средноевропско време, се наведува во соопштението на SAC, пренесе Ројтерс.
Продолжениот прекин на сообраќајот се случува во екот на летната туристичка сезона и погоди илјадници патници, а дополнително ги оптовари и останатите аеродроми на Сицилија.
🔴 Mount Etna Live Stream – Real-Time Volcano Webcam (Sicily, Italy) https://t.co/rPJLwzosgq
— Oppenheimer Ranch Project (@Diamondthedave) August 14, 2026
Според извори од SAC кои ги пренесува италијанската новинска агенција ANSA, актуелните нарушувања претставуваат најтежок случај што го погодил аеродромот во Катанија во најмалку последните две децении.
Од 6 до 12 август биле откажани повеќе од една третина од вкупно 1.974 планирани летови од Катанија, додека околу 630 летови биле пренасочени кон други аеродроми.
Етна, најактивниот вулкан во Европа, често предизвикува проблеми во авионскиот сообраќај во Катанија.
Вулканскиот пепел ги прекрива пистите и околните површини, а може да навлезе и во моторите на авионите и да предизвика сериозни проблеми за време на летот.
Активноста на Етна ја погоди и Малта, јужно од Сицилија, каде што исто така беа откажани летови поради облаците со пепел.